Am Halloween-Samschtig, aso äm 31.Oktober 2009, simmär id Überträägigskontrollä in Kantonsspital Winterthur. Dä Ultraschall hed zeigt das s'Fruchtwassär scho zimli knapp isch und mir werdäd iileite müsä. Für mich isch ä Wält zämmäbrochä. Mini ganz romantisch Vorstellig vonärä Wassergeburt im Geburtshuus, zämä mit oisärä Hebammä wo alläs über mich und ois weiss, isch kabutt gangä. Und dä Arzt hettsmär nöd eifachär gmacht mitäm trochnä Satz "Sie chönd gad da bliibä - äs wär sehr verantwortigslos nöd iizleitä!". Grrr...
Während ich i Träänä uusbrochä bin hed dä Gian sinärä Tantä - oisärä "Notfall-Hebammä" aaglüütä und si isch bereit gsi, ä Extra-Schicht z'machä zum ois während de Geburt z'betroiä, im Spital Bülach.
Mir sind nomal hei gangä, hend öppis gässä, nomal di letschtä Sachä zämäpackt und ois uf de Wäg in Spital gmacht.
Det simmär unglaublich liäb vode Christina empfangä wordä, und churz druff abä hed si ois au dä sympathischi Chefarzt vorgstellt wo au wird däbii si.
Ich han nach allnä üblichä Untersuächigä di erscht weheuuslösend Tablettä dörfä Schluckä, 4h spöta dänn di nögscht. De Arzt hed gfundä, s chöng trotzdem no Mäntig werdä bisäs so wiit segi, und si gäbäd mir etz mal noni meh Tablettli, damiti d'Nacht no schlafä chöng.
Mis Mami und mini gross Schöshter hend ois no dä Laptop und paar DVD's bracht, damit d'Ziit chli schnällär umegaht.
Ich han a dem Abig folgendi Liischtä mit alläm wo passiärt isch zämägstellt:
11°° : Kontrollä im KSW - Zwenig Fruchtwassär, Plazenta verbruucht --> Iileitä.
13°° : Nomal Dihei, ässä, Sachä packt
14.30: Aacho im Spital Bülach
16.15: 1. Tablettä, Zimmerwächsel
17.25: Spaziergang zum Bahnhof, Proviant poschtä
18.10: Wida zrugg im Spital
18.45: 2. Tablettä, as CTG bis 19.30h
19.30: Mama und Jenny chömäd verbii und bringäd dä Laptop und DVDs, Tee trinkä zämä
20.30: Zrugg im Zimma, wida as CTG
23.15: Nachtschicht-Hebammä Hallo - ändlich wäg vom CTG
D'Hebammä hedmär gseit, ich chöng falls d Wehe scho z'starch werdäd zum schlafä, äs Schmerzmittäl verlangä. Wenns "ächti" Geburtswehe segäd, gechäds wäg dem nöd wäg.
So öppä am halbi 1 idä Nacht hani das Schmerzmittäl verlangt - hed aber nüt meh gnützt. D'Wehe sind i 3-5min Abständ cho, amigs au ohni Pausä und sind richtig schwer zum verarbeite gsii. Aso bini id Badwannä. Det sind d'Wehe zwar gliich regelmässig cho, aber vill liächter zum verschnuufä gsii. Zwüschäd dä Wehe hend de Gian, d'Hebammä und ich ploidärlät, und nach jederä Wehe hends mich mit "Supa! Scho widär eini weniger!" uufgmunteret und motiviert.
Am 03°° dänn bini us de Badwannä ufs Bett, für d'Kontrollä wi wiit dä Muättermund scho offä isch - er isch no fasch nöd uufgangä gsii und no ganz hert.
Das isch schlimm gsii. Di ganz Arbet und di ganzä Schmerzä für nüt?
Ich han ä Sprützi bechoo, wo dä Muetermund weich macht, damiter sich schnellär öffnä chan - mich aber zimli verflasht hed =)
Uf eimal isch d'TV-Total-Show i mim Chopf umägeishteret...
D'Nachtschicht-Hebammä hed dä Christina aaglüütät, dasäs "ernscht" segi, und si söll verbii cho. Am 4i ischsi da gsi - und den isch au gad s Fruchtwassär platzt. Am 04:46 isch er da gsii, oisä wundersüäss
Jimmy Finian Gian
3070g Liächt,
49cm winzig.
Min erschtä Gedankä won ich ihn gseh han, isch "Mein Gott, er isch so wunderwunderschön!" gsii, und ich kriäg imma no Hüänerhuut wenni a de Augeblick dänk.
Eidüütig dä allärschönscht i mim ganzä Läbä.
Min supertapfärä Schatz isch übrigäns eifach grandios gsii. Find gar kei Wort däfüür wiä genial er mich unterstützt und mir ghulfä hed. Bin supa-froh ischer da gsii und hed das mit mir durägstandä. Wahrschinlich wird er niä ganz wüssä wiä unendlich froh und wiä dankbar ich ihm für das bin.
Mittlärwiilä sind fascht 3 Mönät vergangä - und näbäd mir liit än supersüässä Winzling, schönär als jedes andärä Wäsä wos je ghee hed und je geh wird.
Jede Tag lernt er was nois und isch so ufgstellt und fründlich zu allnä. Und schlafä duät er - wer hätte es gedacht - scho vo aafang ah durä =) Das heisst er schlaft ca abäm 10ni und will dänn so um di 8i widär ässä. Er isch aifach än Sunnäshii.
Sachä wonär scho chan:
- Grüsch wi "gnnnnn", "aaaahh", "määä", "aaawww", "öuup" , "uuuuh", "wäääau"
"aa!" , "ääuuu" , "ügauuu" und ähnlichs ^^
- Äugli riibä
- Tüümälä (meishtens no mit dä ganzä Hand ;-) )
- Spilsachä ganz churz fesht-hebä
- Hängende Sachä aaghee
- Ufrächt stah (mit Balance-Hilf ^^)
- Straahlä, Lachä und gigälä =))
- schimpfä und mötzlä (muäs au sii ;-) )
und jede tag nois =))
Ich hoff das ich imma ma wida di noischtä News uufschriib =)
Froiäd ois uf Comments , logooooo ;-)
Ps: Na paar Bilder:
Keine Kommentare:
Kommentar veröffentlichen