Yibbie: 39. Schwangerschaftswuche!

Äääändlich hemmer hüt wieder zu oisere Hebamme id Kontrolle chöne - das heisst das scho wieder 2 Wuche ume sind! Jedes mal es Highlight =) Hüt bini genau 38+0, also 38Wuche und 0 Täg schwanger. No genau 2 Wuche bis zum Geburtstermin!
Bim Buuchumfang mässä (de isch übrigens 109cm) und abtaschte hed sie aber s'Gfühl gha, das de Chlii zwenig zuegno hed sit letschtem mal... Drum hemmer den so äs doophs CTG (Cardiotokographie: Wehen- und Herztonschreiber) mache müse.

Uf d'Siite ligge, zwei Gürt mit zwei Handfläche-grosse "Chnöpf" dra um de Buuch schnalle, ganz tüürs Grätli iihschalte und los gehts. Düdummdüdummdüummdüdumm macht s'Herzli und immer wen sich de chli bewegt ruschts eimal ganz luut - drum ruuschts bi ois eigentlich immer =)

Mitem CTG luegt mär, ob d'Herztön schön unregelmässig sind - regelmässig wür nämli heisse das d'Plazenta s'Chind z'wenig guet versorgt und nüme richtig schafft - das widerum chan en Grund sii warum de Chlii z'liecht isch.

Hüt sind d'Herztöndli wuuunderbar gsi - wi immer bis jetzt. Bis de Chlii Rabauke iipfüüselet isch ;-) denn sinds uf eimal ganz regelmässig worde - so, das d'Hebamme oise Sohnemann gad mal mit paar heftige Buch-dureschüttler gweckt hed. Chum ischer wach gsi isch wieder aaaalles tiptop gsi ;-)

Er merkt au ganz genau wenn sin Daddy mit ihm redet oder de Buuch streichlet - jedesmal wenner das gmacht hed isch de Puls vom chline ufegschosse; er hed sich sicher meega gfroit wener gmerkt hed das sin Papa da isch und uf ois biz uufpasst ;-)

Nachere süsch seeehr langwiilige Halbstund (CTG isch immer langwiilig und gaht immer ä Halbstund - ussert im Spital, det gahts au guet mal meh als ä ganzi Stund ... nerv... ) hemmer endlich chönne uufstah und hei go ässä und äm Grossmami in Spe Bricht erstatte.

Dä nögschti Termin hemmer am 16.Oktober.. Mal luege ob mär dänn überhaupt no id Kontrolle müänd oder ob Monsieur sich en Geburtstag vorem 16. uussuecht... ;-) Es bliibt spannend und d'Wette laufed heiss:

Min Daddy seit das sin erschte Enkel am 23. Oktober oder nacher das Licht der Welt erblickt.
...Wenn er Recht het, mues ich und mini Mam sini Autos putze -.- ...

Ich seg er chunnt vorem 23.Oktober und hoff ich wird rächt ha - denn zhallt de früschbackni Grossvater nämli s' Babyfotoshooting =) *frooooi*

D'Tante vom Baby hofft, daser ersch nach dem Weekend chunnt will si denn no weg isch...
...Und di ander Tante hofft uf Ihre 15.Geburtstag : de 21.Oktober.

S' zuekünftige Urgrossmami würs schön finde wenn ihre 8.Urenkel ihre Geburtstag bevoorzuuge wür: de 13.Oktober.

Ich und de Gian würded natüürli de 18.Oktober wunderschön finde - genau 9 Mönet nach dem mir zämächo sind =)

Anderi hoffed uf nachem 14.Oktober wills bis den no weg sind oder oder uf vorem 23. wills nacher weg sind...

Jepp, de Chlii hed scho voooll de überfüllt Terminkalender - das gits doch nöd =)

Ich jedefalls bin uuuuh noigiirig und hibbelig z'gseh weles Datum er sich uussuecht und chas chum erwarte oise chlii riesig Stolz endlich z'gseh und kennezlerne =) Gnüsse d'Ziit allai und mit em Gian zeme aber trotzdem no ganz fescht ... =)